Mitsubishi Corporation Қазақстандағы қызметті кеңейту мүмкіндігін қарастыруда
Астана, 2024 жылғы 13 қараша – Қазақстан Республикасы Сыртқы істер министрінің орынбасары Әлібек Қуантыров және «Kazakh Invest» ҰК» АҚ басқарма төрағасының орынбасары Мадияр Сұлтанбек Қазақстандағы «Mitsubishi Corporation» бас директоры Тецуя Сугитамен кездесу өткізді.
Келіссөздер барысында Ә.Қуантыров Қазақстанның жаңа инвестициялық саясаты одан әрі экспортқа баса назар аудара отырып, қосылған құны жоғары өндірістерді дамытуға бағытталғанын атап өтті. Осыған байланысты озық жапон технологиялары кадрлық және технологиялық әлеуетті нығайтуда маңызды рөл атқара алады.
Кездесу барысында «Mitsubishi Corporation» өкілдері тұрақты даму мен көміртегі ізін азайтуға бағытталған 2024 жылғы корпоративтік стратегиясын ұсынды. Кездесу аясында қазақстандық тарапқа сутегі технологияларын пайдалану үшін инфрақұрылым құру және жаңартылатын энергетика саласында шешімдер әзірлеу сияқты перспективалы жобалар ұсынылды. Осыған байланысты, компанияның энергетикалық инновацияларға, цифрлық трансформацияға және жоғары технологиялық өндіріске беретін маңызы Қазақстанның төмен көміртекті экономиканы дамыту жөніндегі мақсаттарына толық сәйкес келеді.
Тараптар орнықты даму саласындағы ынтымақтастықтың негізгі бағыттарын, оның ішінде энергетика секторында, инфрақұрылымда және өнеркәсіпте озық технологияларды енгізу мен жобаларды іске асыруды талқылады. «Mitsubishi Corporation» өкілдері компанияның Қазақстандағы қатысуын кеңейтуге және өңірдің тұрақты дамуын қолдауға бағытталған жаңа бастамаларды іске асыруға қызығушылық білдірді. Бұған дейін «C5+Жапония» бизнес-форумы аясында «Mitsubishi Corporation» компаниясы «Central Asia Climate Foundation» және «Rakurs Tech LLC» компанияларымен өзара түсіністік туралы меморандумға қол қойды.
Кездесу қорытындысы бойынша тараптар компанияның энергетикалық және цифрлық трансформация саласындағы жаһандық бастамаларын ескере отырып, ынтымақтастықты дамытуға келісті.
Анықтама:
«Mitsubishi Corporation» өкілдігі Қазақстан Республикасында 1993 жылы ашылды. 1998 жылы корпорация Қазақстан Республикасының Президенті басқаратын Шетелдік инвесторлар кеңесінің мүшесі болып қабылданды. Елде жұмыс істеген жылдары корпорация Mitsubishi Heavy Industries, Mitsubishi Electric, Mitsubishi Motors, Metal One секілді басқа Мицубиси тобының компанияларын Қазақстанда бизнес және түрлі жобаларды дамытуға тартты. Сонымен қатар, корпорация басқа жапондық өндірушілердің, мысалы, жүк және өнеркәсіптік шиналар шығарушы Bridgestone, құрылыс және тау-кен техникасын шығаратын Hitachi, электроника өнімдерін шығаратын Toshiba, Fujitsu және Sharp компанияларының тауарлары мен жабдықтарын Қазақстанға жеткізу мен ілгерілетуге атсалысты. Экологияны жақсарту бағыты бойынша корпорация көмір станцияларынан шығатын зиянды қалдықтарды азайту үшін Жапонияның озық технологияларын енгізу жұмыстарын жүргізді. Адамдық және мәдени ресурстарды дамыту бағытында корпорация Қазақстандағы түрлі оқу және мәдени мекемелерге Жапонияның ODA көмегі аясында гранттар бөлді, сондай-ақ Қазақстан студенттеріне Жапонияда білім алу үшін стипендиялар тағайындады.
